მაია ცქიტიშვილმა ადიგენის მუნიციპალიტეტის მოსახლეობას ზარზმობა მიულოცა

მაია ცქიტიშვილმა ადიგენის მუნიციპალიტეტის მოსახლეობას ზარზმობა მიულოცა

საქართველოს ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა ზარზმობის დღესასწაული ადიგენის მუნიციპალიტეტის მოსახლეობას წმინდა გიორგის სახელობის ტაძარში საზეიმო წირვის შემდეგ მიულოცა. 
დღესასწაული სოფელ ზარზმაში, ზარზმის მონასტრის დამაარსებლის სერაპიონ ზარზმელის ხსენების დღეს გაიმართა. ზარზმობა სახალხო-რელიგიური დღესასწაულია, რომელსაც  არა მხოლოდ ადიგენის მოსახლეობა, არამედ  ქვეყნის სხვადასხვა კუთხიდან ჩასული საერო და სასულიერო პირები ზეიმობენ.
ვიცე-პრემიერი სოფელ მოხეს მოსახლეობასაც შეხვდა და სოფლის საჯარო სკოლა დაათვალიერა. სკოლა რამდენიმე  სოფლის 200-მდე ბავშვს ემსახურება. სოფელ მოხეს რეაბილტაციას, ევროპის საინვესტიციო ბანკის დაფინანსებით, საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი განახორციელებს.  პროექტი ითვალისწინებს არსებული სკოლის სრულ (საკლასო ოთახების, საპირფარეშოების, სპორტ დარბაზის, სპორტული მოედნის) რეაბილიტაციას  და ეზოს ტერიტორიის კეთილმოწყობას. იგეგმება გათბობის, წყალსადენის და კანალიზაციის სისტემების გამართვა. სარეაბილტაციო სამუშაოები 2019 წელს დაიწყება. 
მუნიციპალური განვითარების ფონდი ადიგენის მუნიციპალიტეტში, სოფელ ზარზმის  საჯარო სკოლის რეაბილიტაციასაც იწყებს. ყველა  სკოლა ადაპტირებული იქნება შეზღუდული შესაძლებლობების მქონე პირებისთვის. 
ასევე, დაგეგმილია ზარზმის მონასტრის მიმდებარედ ტურისტული ინფრასტრუქტურის, მათ შორის, საფეხმავლო ბილიკის მოწყობის, ზარზმის გუმბათის და კულტურული მემკვიდრეობის სტატუსის მქონე თამარის წყაროს რეაბილიტაციის სამუშაოები. 
რეგიონული განვითარებისა და ინფრასტრუქტურის მინისტრმა ახალციხის მოსახლეობის პრობლემები და ინიციატივებიც მოისმინა. მინისტრმა ადგილობრივ მოსახლეობას მიაწოდა ინფორმაცია უკვე დაგეგმილი ინფრასტრუქტრული პროექტების შესახებ. კერძოდ, 2019 წელს ახალციხეში იწყება კულტურის სახლის, პროფესიული სასწვალებლისა და საცურაო აუზის მშენებლობა, ხოლო სოფელ ვალეს მოსახლეობის წყალმომარაგების მრავალწლიანი პრობლემის გადასაჭრელად, 2019 წელს აზიის განვითარების ბანკის დაფინანსებით, დაიწყება სოფლის წყალმომარაგების სიტემის სარეაბილიტაციო სამუშაოები. 
სამცხე-ჯავახეთის რეგიონში არაერთი ინფრასტრუქტურული პროექტის განხორციელებაა დაგეგმილი,  როგორც საგზაო ინფრასტრუქტურის მოწესრიგების, ისე სკოლებისა და ბაღების მშენებლობის ჩათვლით. ახალი სკოლები აშენდება ასპინძის მუნიციპალიტეტის სოფელ ორგორში, ნინოწმინდის მუნიციპალიტეტის სოფელ ორლოვკაში, ადიგენის მუნიციპალიტეტის სოფელ ღორთუბანში, ხოლო ახალციხის მუნიციპალიტეტის სოფელ წყრუთაში 3 სოფლის ბავშვებისთვის საბავშვო ბაღის მშენებლობა დაიწყება.